🇳🇿 နယူးဇီလန်မှာ နေထိုင်ဖို့ နေရာဘယ်လိုရွေးမလဲ?

နယူးဇီလန်မှာ အခြေချဖို့ နေရာရွေးချယ်တဲ့အခါ လူအများစု အဓိက စဉ်းစားလေ့ရှိတဲ့အချက်တွေကတော့ အလုပ်အကိုင်အခွင့်အလမ်း၊ လူနေမှုစရိတ်၊ လုံခြုံရေးနဲ့ ရာသီဥတုတို့ ဖြစ်ပါတယ်။

---

🧑‍💼 အလုပ်အကိုင်အခွင့်အလမ်း

အလုပ်အကိုင်အခွင့်အလမ်းတွေကို ပိုပြီးမြင်သာအောင် လူဦးရေအချက်အလက်နဲ့ နှိုင်းယှဉ်ပြချင်ပါတယ်။

စင်္ကာပူမှာ လူဦးရေ သိန်း ၆၀ ခန့်ရှိပြီး နယူးဇီလန်မှာ ၅၃ သိန်း ခန့်သာရှိပါတယ်။ သို့သော် စင်္ကာပူအကျယ်အဝန်းမှာ နယူးဇီလန်‌အောက်ဆုံးက စတီးဝပ်ကျွန်း (Stewart island) ရဲ့ တစ်ဝက်တောင်မရှိပါဘူး။ ဆိုတော့ ဘယ်လောက်လူနေကျဲလဲဆိုတာ သိနိုင်မှာပါ။ ပုံမှာတွေ့ရှိတဲ့အတိုင်းပဲ လူနေများတဲ့ အနီရောင်၊ အဝါရောင်ပြထားတဲ့နေရာတွေ နဲဲနဲလေးပါ။ 

Photo: By Vardion - Own work, CC BY 4.0, 

https://commons.wikimedia.org/w/index.php?curid=154154466

ပုံမှန်အားဖြင့်တော့ လူဦးရေများတဲ့မြို့တွေမှာ အလုပ်အကိုင်အခွင့်အလမ်းတွေ ပိုများလေ့ရှိပါတယ်။ အောက်မှာတော့ တက္ကသိုလ်ရှိတဲ့ မြို့တွေနဲ့ အလုပ်အကိုင်အခွင့်အလမ်းများတဲ့မြို့တွေရဲ့ လူဦးရေအချက်အလက်ကို ဖော်ပြပေးထားပါတယ်။

🔹🔹🔹🔹🔹

📍 အော်ကလန် (Auckland) - လူဦးရေ ၁၅ သိန်းခန့်

💼အဓိကလုပ်ငန်းနယ်ပယ်များ - ငွေကြေး၊ စီးပွားရေး၊ IT နည်းပညာ၊ သယ်ယူပို့ဆောင်ရေး၊ ကုန်သွယ်ရေး၊ ပညာရေး၊ ကျန်းမာရေးနဲ့ အခြားအထူးဝန်ဆောင်မှုများ။

🎓တက္ကသိုလ်များ - University of Auckland, Auckland University of Technology (AUT), Massey University

👉နယူးဇီလန်မှာ လူဦးရေအများဆုံးမြို့ဖြစ်ပြီး အလုပ်အမျိုးအစားအများဆုံးနဲ့ လစာအမြင့်ဆုံးနေရာလည်း ဖြစ်ပါတယ်။

🔹🔹🔹🔹🔹

📍 ခရိုက်စ်ချက်ချ် (Christchurch) - လူဦးရေ ၄ သိန်းခန့်

💼အဓိကလုပ်ငန်းနယ်ပယ်များ - ဆောက်လုပ်ရေး၊ အင်ဂျင်နီယာ၊ စိုက်ပျိုးရေးနည်းပညာ၊ အစားအစာထုတ်လုပ်မှု၊ ပညာရေးနဲ့ ခရီးသွားလုပ်ငန်း။

🎓တက္ကသိုလ်များ - University of Canterbury, Lincoln University

👉တောင်ကျွန်းရဲ့အကြီးဆုံးမြို့ဖြစ်ပြီး စီးပွားရေးအချက်အချာကျပါတယ်။ အထူးသဖြင့် အင်ဂျင်နီယာနဲ့ ဆောက်လုပ်ရေးလုပ်ငန်းတွေ ပေါများပါတယ်။

🔹🔹🔹🔹🔹

📍 ဝယ်လင်တန် (Wellington) - လူဦးရေ ၂ သိန်းခန့် 

💼အဓိကလုပ်ငန်းနယ်ပယ်များ - အစိုးရဝန်ဆောင်မှုများ၊ မူဝါဒဆိုင်ရာလုပ်ငန်းများ၊ ယဉ်ကျေးမှု၊ အနုပညာ၊ မီဒီယာ၊ IT နှင့် ဂိမ်းဒီဇိုင်း။

🎓တက္ကသိုလ်များ - Massey University, Victoria University of Wellington

👉နယူးဇီလန်ရဲ့မြို့တော်ဖြစ်ပြီး နိုင်ငံရေးနဲ့ ယဉ်ကျေးမှု အချက်အချာဖြစ်ပါတယ်။ သုတေသနအဖွဲ့အစည်းများလည်း အများအပြားရှိပါတယ်။

🔹🔹🔹🔹🔹

📍 ဟာမီလ်တန် (Hamilton) - လူဦးရေ ၁.၉ သိန်းခန့်

💼အဓိကလုပ်ငန်းနယ်ပယ်များ - နို့ထွက်ကုန် (Fonterra ရဲ့ဌာနချုပ်တည်ရှိရာ)၊ ဓာတုဗေဒနဲ့ စိုက်ပျိုးရေးနည်းပညာ။

🎓တက္ကသိုလ်များ - University of Waikato

👉အော်ကလန်နဲ့နီးပြီး နေထိုင်စရိတ်သက်သာပါတယ်။ နည်းပညာနဲ့ စိုက်ပျိုးရေးပေါင်းစပ်လုပ်ကိုင်တဲ့နေရာလည်း ဖြစ်ပါတယ်။

🔹🔹🔹🔹🔹

 

📍 ထော်ရန်ဂါ (Tauranga) - လူဦးရေ ၁.၆ သိန်းခန့်

💼အဓိကလုပ်ငန်းနယ်ပယ်များ - ဆိပ်ကမ်း၊ ပို့ကုန်ကုန်သွယ်ရေး၊ သစ်သီးဝလံ (Zespri ရဲ့ဌာနချုပ်တည်ရှိရာ) နဲ့ ခရီးသွားလုပ်ငန်း။

👉အလျင်အမြန်တိုးတက်နေတဲ့ ဆိပ်ကမ်းမြို့ဖြစ်ပြီး နေထိုင်ရတာ သာယာပါတယ်။

🔹🔹🔹🔹🔹

📍 ဒန်နီဒင် (Dunedin) - လူဦးရေ ၁ သိန်းခန့်

💼အဓိကလုပ်ငန်းနယ်ပယ်များ - ဆေးဘက်ဆိုင်ရာသုတေသန၊ သဘာဝပတ်ဝန်းကျင်ထိန်းသိမ်းရေး ခရီးသွားလုပ်ငန်း။

🎓တက္ကသိုလ်များ - University of Otago

👉ကျောင်းသားမြို့ဖြစ်ပြီး လူငယ်အများစုနေထိုင်ကြပါတယ်။ ဆေးဘက်နဲ့ ပညာရေးဆိုင်ရာ အလုပ်တွေ ပေါပါတယ်။

🔹🔹🔹🔹🔹

📍 ပါမာစတန်မြောက် (Palmerston North) - လူဦးရေ ၈ သောင်းခန့်

💼အဓိကလုပ်ငန်းနယ်ပယ်များ - စိုက်ပျိုးရေးသုတေသနနဲ့ အစားအစာနည်းပညာ။

🎓တက္ကသိုလ်များ - Massey University

👉သုတေသနအဖွဲ့အစည်းတွေ အများစုရှိပြီး စိုက်ပျိုးရေးနည်းပညာဆိုင်ရာ အလုပ်တွေများပါတယ်။

🔹🔹🔹🔹🔹

 

📍 အင်ဗကားဂို (Invercargill) - လူဦးရေ ၅ သောင်းခန့်

💼အဓိကလုပ်ငန်းနယ်ပယ်များ - စိုက်ပျိုးရေး၊ အစားအစာထုတ်လုပ်မှု၊ ဆိပ်ကမ်းနဲ့ ငါးဖမ်းလုပ်ငန်း။

🎓တက္ကသိုလ်များ - Southern Institute of Technology (SIT)

👉တောင်ကျွန်းရဲ့ အောက်ဆုံးမြို့ပြဖြစ်ပြီး နိုင်ငံတကာကျောင်းသားတွေလည်း လာရောက်ပညာသင်ကြားကြပါတယ်။

🔹🔹🔹🔹🔹

📌အကျဥ်းချုပ်ပြောရရင် အော်ကလန်မှာ တစ်နိုင်ငံလုံးရဲ့ လူဦးရေ လေးပုံတစ်ပုံကျော်ရှိတဲ့အတွက် အခွင့်အလမ်းအများဆုံး၊ ပညာရေးနဲ့ ကျန်းမာရေးဝန်ဆောင်မှုတွေ အများဆုံးရနိုင်တဲ့မြို့ ဖြစ်ပါတယ်။

---

💰 လူနေမှုစရိတ်

အလုပ်အကိုင်အခွင့်အလမ်းများတဲ့မြို့တွေရဲ့ အားနည်းချက်ကတော့ နေထိုင်စရိတ် ပိုမြင့်တတ်တာပါပဲ။ အထူးသဖြင့် အိမ်ခြံမြေဈေးနှုန်းတွေ မြင့်မားပါတယ်။ ဒါပေမဲ့ မြို့ကြီးတွေမှာ စားသောက်ကုန်ရွေးချယ်စရာ ပိုများတဲ့အတွက် ကုန်ဈေးနှုန်း သက်သာနိုင်ပါတယ်။

---

🛡️ လုံခြုံရေး

နယူးဇီလန်ဟာ အရင်က ကမ္ဘာပေါ်မှာ အလုံခြုံဆုံးနိုင်ငံတွေထဲက တစ်ခုဖြစ်ပေမဲ့ ကိုဗစ်နောက်ပိုင်းမှာတော့ ရာဇဝတ်မှုတွေ ပိုများလာပါတယ်။ အထူးသဖြင့် အော်ကလန်မြို့မှာ ကားမှန်ရိုက်ခွဲပြီး ပစ္စည်းခိုးယူတာမျိုးတွေ မကြာခဏဖြစ်ပွားတတ်ပါတယ်။

တောင်ကျွန်းဘက်ကတော့ လူဦးရေနည်းပြီး မြို့ပြလှုပ်ရှားမှုနည်းတဲ့အတွက် လုံခြုံရေး ပိုကောင်းပါတယ်။ ကျေးလက်ဒေသတွေမှာဆို ရာဇဝတ်မှု မရှိသလောက် ရှားပါတယ်။

---

🌤️ ရာသီဥတု

🌴မြောက်ကျွန်း (North Island) – ပိုပြီးနွေးထွေးပါတယ်။ မြို့ပြတွေရဲ့ တစ်နှစ်တာ အပူချိန်က များသောအားဖြင့် ၆°C ကနေ ၂၅°C အတွင်းမှာရှိပါတယ်။

🏔တောင်ကျွန်း (South Island) – ရာသီဥတုက ပိုအေးမြပါတယ်။ အထူးသဖြင့် တောင်တန်းဒေသတွေမှာ ပိုအေးနိုင်ပါတယ်။ ဒါပေမဲ့ မြို့ပြတွေရဲ့ တစ်နှစ်တာ အပူချိန်ကတော့ များသောအားဖြင့် ၁°C ကနေ ၂၃°C အတွင်းမှာပဲ ရှိပါတယ်။

တချို့တွေက အအေးဒဏ်ကို စိုးရိမ်တတ်ကြပေမဲ့ နယူးဇီလန်က အဆောက်အအုံတိုင်းမှာ အပူပေးစနစ် (heater) တွေ ပါလေ့ရှိပါတယ်။ အပြင်ထွက်တဲ့အခါ နွေးနွေးထွေးထွေး ဝတ်ဆင်မယ်ဆိုရင်သိပ် စိုးရိမ်စရာမရှိပါဘူး။ ဘယ်လိုနွေးနွေးထွေးထွေးနေရမလဲ ဆိုတာ ဖတ်ကြည့်လို့ရပါတယ်။

ဒါ့အပြင် နယူးဇီလန်က မြောက်ဝင်ရိုးစွန်းနားက နိုင်ငံတွေလို နှင်းအမြဲကျပြီး အိမ်ကထွက်တိုင်းနှင်းတွေဖယ်ရှင်းရတာ၊ ရေပိုက်တွေ ရေခဲတာမျိုးတွေ မဖြစ်တတ်တဲ့အတွက် နေထိုင်ဖို့ သင့်တော်ပါတယ်။ တောင်ကျွန်းရဲ့ အောက်ဆုံးမြို့ဖြစ်တဲ့ အင်ဗကားဂိုမြို့မှာတောင် တစ်နှစ်ပတ်လုံး နှင်းတွေ ဖုံးနေတာမျိုး မဟုတ်ပါဘူး။ တစ်ခါတစ်လေပဲနှင်းကျတာပါ။

အားလုံးပဲ ကိုယ့်အတွက် အသင့်တော်ဆုံး နယူးဇီလန်က နေရာတစ်ခုကို ရွေးချယ်နိုင်ကြပါစေလို့ ဆုတောင်းပေးလိုက်ပါတယ်။

မှ သွန်းသစ်သူ🌼