🎁ဒီဇင်ဘာ ၂၆ ရက်နေ့မှာ ကျရောက်တဲ့ "Boxing Day" ဆိုတာ ဘာလဲ? ပစ္စည်းပြန်လဲတဲ့နေ့လား၊ လက်ဆောင်ပေးတဲ့နေ့လား? 🎁

 

ဒီနေ့ဟာ နယူးဇီလန်တင်မကဘဲ ယူကေ၊ ဩစတြေးလျ၊ ကနေဒါ စတဲ့ နိုင်ငံအတော်များများမှာလည်း အစဉ်အလာမပျက် ကျင်းပကြတဲ့ ရုံးပိတ်ရက်တစ်ခု ဖြစ်ပါတယ်။ 

လူအများစုက ခရစ္စမတ်အကြိုနေ့ (Christmas Eve) နဲ့ ခရစ္စမတ်နေ့ (Christmas or Xmas) အကြောင်းကို ကောင်းကောင်းသိကြပေမဲ့၊ ကျမ နယူးဇီလန်ကို စရောက်ခါစက "Boxing Day" ဆိုတာကို ပထမဆုံးအကြိမ် ကြားဖူးခဲ့တာပါ။

အဲဒီတုန်းက ကျမကြားဖူးတဲ့ ပြောစကားတစ်ခုရှိတယ် - "ခရစ္စမတ်မှာ ရတဲ့လက်ဆောင်တွေကို ဖောက်ကြည့်လို့မှ မကြိုက်ရင် နောက်တစ်ရက် (ဒီဇင်ဘာ ၂၆ ရက်) မှာ သေတ္တာ (Box) ထဲပြန်ထည့်ပြီး ဆိုင်မှာ သွားပြန်လဲလို့ရလို့ Boxing Day လို့ ခေါ်တာ" တဲ့။ ဒါက တကယ်တော့ ချစ်စရာကောင်းတဲ့ အထင်မှားမှုလေးတစ်ခုပါ။

---

📜 တကယ်တော့ Boxing Day ရဲ့ သမိုင်းက ပိုပြီးလေးနက်ပါတယ်

ဒီနာမည်က လက်ဝှေ့ထိုးတာနဲ့လည်း မဆိုင်သလို၊ ပစ္စည်းပြန်လဲတာနဲ့လည်း မဆိုင်ပါဘူး။ မူလဇစ်မြစ်ကတော့-

၁။ အလှူသေတ္တာများ (The Alms Box): ရှေးခေတ်က ဘုရားကျောင်းတွေမှာ ဆင်းရဲသားတွေအတွက် အလှူငွေကောက်ခံတဲ့ သေတ္တာ (Box) တွေကို ခရစ္စမတ်ပွဲအပြီး နောက်တစ်ရက်မှာ ဖွင့်လှစ်ပြီး လိုအပ်သူတွေကို ဝေငှပေးကမ်းလေ့ ရှိခဲ့ပါတယ်။

၂။ အလုပ်သမားများအတွက် လက်ဆောင်: အင်္ဂလန်ရဲ့ ရှေးအစဉ်အလာအရ ခရစ္စမတ်နေ့မှာ အလုပ်လုပ်ပေးခဲ့ရတဲ့ အစေခံတွေနဲ့ အလုပ်သမားတွေကို နောက်တစ်ရက်မှာ သခင်တွေက လက်ဆောင်နဲ့ ဆုကြေးငွေတွေကို သေတ္တာ (Box) လေးတွေနဲ့ ထည့်ပေးပြီး မိသားစုဆီ ပြန်ခွင့်ပေးခဲ့တာကနေ Boxing Day ဆိုပြီး ဖြစ်ပေါ်လာတာပါ။

ဒါကြောင့် ဒီနေ့ရဲ့ စစ်မှန်တဲ့ အနှစ်သာရက "မျှဝေခြင်း" နဲ့ "အလုပ်သမားတွေကို အသိအမှတ်ပြု အနားပေးခြင်း" ပဲ ဖြစ်ပါတယ်။ ဒါကြောင့်လည်း ကျမကတော့ Boxing Day ကို "အလှူသေတ္တာပွဲနေ့" လို့ ခေါ်ဆိုချင်ပါတယ်။

---

🛍️ ဒါပေမဲ့... ယနေ့ခေတ်မှာတော့ စျေးဝယ်ထွက်ဖို့ အကောင်းဆုံးနေ့ပဲ!

သမိုင်းကြောင်းက ဘာပဲဖြစ်ဖြစ်၊ လက်ရှိနယူးဇီလန်မှာတော့ အလှူသေတ္တာပွဲနေ့ဟာ တစ်နှစ်တာလုံးမှာ ဈေးနှုန်းအသက်သာဆုံး ဈေးဝယ်ပွဲတော်ကြီး တစ်ခုအဖြစ် လူသိများနေဆဲပါ။

တကယ်လို့ ဆိုင်တွေမှာ လူတိုးရမှာကို စိုးရိမ်နေတယ်ဆိုရင်လည်း စိတ်မပူပါနဲ့။ အခုချိန်ထိ အင်တာနက်မှာ ဈေးလျှော့ပေးနေတုန်းမို့ ဝယ်ချင်တာရှိရင် အွန်လိုင်းကနေ အော်ဒါတင်လိုက်ဖို့ အချိန်မီသေးတယ်နော် 💻📱

---

💰 အလုပ်သမားအခွင့်အရေးနှင့် အပြင်ထွက်စားသောက်ခြင်း (Surcharge)

အလှူသေတ္တာပွဲနေ့ဟာ အစိုးရရုံးပိတ်ရက် (Public Holiday) ဖြစ်လို့ နယူးဇီလန်က အလုပ်သမားတွေအတွက် အခွင့်အရေးတွေ ရှိပါတယ်။

✅ အလုပ်ပိတ်ရင်: လစာပုံမှန်ရမယ်။ 

✅ အလုပ်ဆင်းရရင်: အနည်းဆုံး ၁.၅ ဆ (Time and a Half) လစာရမယ်။ 

✅ အစားထိုးခွင့်: အလုပ်စာချုပ်ပေါ် မူတည်ပြီး နောက်ထပ်တစ်ရက် အားလပ်ရက် အစားထိုး (Day in Lieu) ကိုလည်း ရရှိနိုင်ပါတယ်။

⚠️ မှတ်ချက်: အလုပ်သမားတွေကို လစာ ၁.၅ ဆ ပေးရတဲ့အတွက် ဒီလိုရုံးပိတ်ရက်မျိုးမှာ အပြင်ထွက် စားသောက်မယ်ဆိုရင် စားသောက်ဆိုင် တော်တော်များများမှာ ၁၀% မှ ၁၅% အထိ အားလပ်ရက် အပိုခ (Public Holiday Surcharge) ကောက်ခံလေ့ရှိတာကိုလည်း သတိပြုစေချင်ပါတယ်ရှင်။

အားလုံးပဲ ပျော်ရွှင်စရာ အားလပ်ရက်လေး ဖြစ်ပါစေရှင်။ နှစ်သစ်မှာလည်း ကံကောင်းခြင်းတွေ အများကြီး ပိုင်ဆိုင်နိုင်ကြပါစေ 💙

မှ သွန်းသစ်သူ🌼

#BoxingDayNZ #NewZealandLife #နယူးဇီလန် #BoxingDayHistory #OnlineShopping #WorkLifeBalance #PublicHolidaySurcharge #HappyHolidays