🇳🇿 နယူးဇီလန်လား? 🇦🇺 ဩစတြေးလျလား? နေထိုင်ခွင့်ယူပြီးမှ ပြောင်းရွှေ့ရခြင်း အကြောင်းရင်းများနှင့် နိုင်ငံနှစ်ခု နှိုင်းယှဉ်ချက်

အကိုတစ်ယောက်က လူတော်တော်များများဟာ နယူးဇီလန်မှာ နိုင်ငံသားခံယူပြီးမှ ဘာလို့ ဩစတြေးလျကို ပြောင်းသွားကြတာလဲ၊ ဘာလို့ ဩစတြေးလျကို တစ်ခါတည်းမသွားရတာလဲလို့ မေးထားပါတယ်။ ဒီမေးခွန်းကို ဖြေရင်းနဲ့ နိုင်ငံနှစ်ခုရဲ့ အားသာချက်၊ အားနည်းချက်တွေကို နှိုင်းယှဉ်ပြပေးသွားပါမယ်။

တိုရင်းလိုရှင်း ဖြေရမယ်ဆိုရင်တော့ လူအများစုအတွက် နယူးဇီလန်က နိုင်ငံသားရဖို့ ပိုလွယ်ကူ ပြီး ဩစတြေးလျက လူအများစု ပိုပြီး သဘောကျနှစ်သက်တဲ့ မြို့ပြလူနေမှုပတ်ဝန်းကျင်နဲ့ အလုပ်အကိုင် အခွင့်အလမ်း၊ လစာတွေကို ပေးနိုင်လို့ ဖြစ်ပါတယ်လို့ ယူဆပါတယ်။

---

🔑 ဘာလို့ နယူးဇီလန်က နိုင်ငံသားရဖို့ ပိုလွယ်လဲ?

၁။ နေထိုင်ခွင့်လမ်းကြောင်း (Residence Pathway)

• 🇳🇿 နယူးဇီလန် (NZ):

  • လက်ရှိ ကျင့်သုံးနေတဲ့ SMC (ကျွမ်းကျင်လုပ်သား ရွှေ့ပြောင်းနေထိုင်သူ အမျိုးအစား Skilled Migrant Category) ၆ မှတ်စနစ် ဟာ ရိုးရှင်းပါတယ်။

  • လူအများစုအတွက် အလွယ်ကူဆုံး လမ်းကြောင်းကတော့ တက္ကသိုလ်ဘွဲ့ရရှိထားပြီး၊ ဒီနိုင်ငံရဲ့ ပျမ်းမျှလုပ်ခလစာ (Median Wage) ပေးနိုင်တဲ့ အလုပ်ရရှိတာနဲ့ နေထိုင်ခွင့်ဗီဇာ (Residence Visa) လျှောက်ဖို့ အခွင့်အရေးရှိလာနိုင်ပါတယ်။

  • ဘွဲ့က နိုင်ငံအကန့်အသတ် မရှိပေမယ့် NZQA (နယူးဇီလန် အရည်အချင်းစစ် အာဏာပိုင်အဖွဲ့) က အသိအမှတ်ပြုပေးဖို့တော့ လိုပါတယ်။

  • ဒါကြောင့် တက္ကသိုလ်ဘွဲ့ရှိသူများအတွက် အခက်ခဲဆုံးအဆင့်က ပျမ်းမျှလုပ်ခလစာရမယ့် AEWV (အသိအမှတ်ပြု အလုပ်ရှင် အလုပ်ဗီဇာ Accredited Employer Work Visa) ရရှိဖို့ပါပဲ။ နည်းပညာ၊ ဆေးဝါး၊ ဆောက်လုပ်ရေးနဲ့ အခြားကျွမ်းကျင်ပညာရှင်များအတွက် ဒီအခွင့်အလမ်းက ပိုလွယ်ကူနိုင်ပါတယ်။

  • (ဘွဲ့မရှိသူများအတွက် အခြားလမ်းကြောင်းများရှိသော်လည်း နေထိုင်ခွင့်ရရန် လစာအများကြီးလိုအပ်သောကြောင့် ဤနေရာတွင် အသေးစိတ် မဆွေးနွေးထားပါ)။

• 🇦🇺 ဩစတြေးလျ (AU):

  • ဩစတြေးလျက အမှတ်ပေးစနစ် (Point Test) ကို အသုံးပြုပါတယ်။ 

  • အလုပ်အကိုင်စာရင်းထဲ ပါဝင်ရုံမကဘဲ အသက်၊ အင်္ဂလိပ်စာ၊ ပညာရေးနဲ့ အတွေ့အကြုံပေါ်မူတည်ပြီး အနည်းဆုံး ၆၅ မှတ် လိုအပ်ပါတယ်။

  • လက်တွေ့ ပြိုင်ဆိုင်မှုမှာ ဖိတ်ခေါ်စာရဖို့အတွက် ၇၅ မှတ် ဝန်းကျင်လိုအပ်တာကြောင့်၊ NZ ထက် ပိုမိုယှဉ်ပြိုင်မှု ပြင်းထန်ပါတယ်။

၂။ 🤝 အလုပ်ရှင် ပံ့ပိုးမှု ဗီဇာ လုပ်ငန်းစဉ်

• 🇳🇿 နယူးဇီလန် (NZ):

  • AEWV လမ်းကြောင်းက ရိုးရှင်းပါတယ်။ အလုပ်ရှင်က "အသိအမှတ်ပြုအလုပ်ရှင်" (Accredited Employer) ဖြစ်ပြီး Job Check အောင်မြင်တာနဲ့ အလုပ်ဗီဇာလျှောက်နိုင်ပြီး၊ နောက်ပိုင်းမှာ နေထိုင်ခွင့်အဖြစ် ပြောင်းလဲနိုင်တဲ့ အခွင့်အလမ်းရှိတာကြောင့် ပိုပြီးလွယ်ကူပါတယ်။

• 🇦🇺 ဩစတြေးလျ (AU):

  • ယာယီဗီဇာ 482 မှ အမြဲတမ်းနေထိုင်ခွင့် 186 လိုမျိုး လမ်းကြောင်းတွေ ရှိပါတယ်။

  • လိုအပ်ချက်တွေ ပိုတင်းကြပ်ပြီး၊ လစာသတ်မှတ်ချက် (ပုံမှန်အားဖြင့် AUD $70,000 မှ $90,000 အနည်းဆုံး)၊ ကျွမ်းကျင်မှု အကဲဖြတ်ချက်တွေ လိုအပ်လို့ ပိုပြီး ရှုပ်ထွေး ပါတယ်။

၃။ 🗣️ အင်္ဂလိပ်ဘာသာစကား အဆင့်သတ်မှတ်ချက်

• 🇳🇿 နယူးဇီလန် (NZ):

  • အလုပ်ဗီဇာ (AEWV) အတွက် များသောအားဖြင့် အင်္ဂလိပ်စာ လိုအပ်ချက် မရှိသလောက် နည်းပါတယ်။ လိုအပ်ရင်တောင် IELTS 4 လောက်သာ လိုအပ်နိုင်ပါတယ်။

  • ဒါပေမဲ့ နေထိုင်ခွင့်အတွက် IELTS 6.5 လိုမျိုး ပိုမြင့်တဲ့ အဆင့်လိုအပ်ပါတယ်။ ဒါကြောင့် နိမ့်တဲ့အဆင့်နဲ့ စတင်ပြီး၊ နိုင်ငံထဲ ရောက်မှ ဖြည်းဖြည်းချင်း ပြင်ဆင်ဖို့ အချိန်ရနိုင်ပါတယ်။

• 🇦🇺 ဩစတြေးလျ (AU):

  • အခြေခံအားဖြင့် IELTS 6 (တစ်ခုချင်းစီ) လိုအပ်ပေမယ့်၊ အမှတ်ပြိုင်ဆိုင်မှုကြောင့် ဖိတ်ခေါ်စာရဖို့အတွက် IELTS 7 (တစ်ခုချင်းစီ) နဲ့ ညီမျှတဲ့ အဆင့်နီးပါး လိုအပ်နိုင်ပါတယ်။ ဒါကြောင့် အစကတည်းက အင်္ဂလိပ်စာကို အားကောင်းဖို့ လိုပါတယ်။

---

✨ မြို့ပြ၊ အလုပ်အကိုင်နှင့် လူမှုပတ်ဝန်းကျင် နှိုင်းယှဉ်ချက်

ဒီနိုင်ငံ ၂ ခုကို ညီအစ်ကိုနိုင်ငံတွေလို့ ပြောကြပေမယ့် မြို့ပြလူနေမှုဘဝကတော့ တော်တော်လေး ကွာခြားပါတယ်။

အချက်	🇳🇿 နယူးဇီလန် (NZ)	🇦🇺 ဩစတြေးလျ (AU)
အဓိကမြို့များ	အော်ကလန်၊ ဝယ်လင်တန်၊ ခရိုက်စ်ချက်ချ်	ဆစ်ဒနီ၊ မဲလ်ဘုန်း၊ ဘရစ်စဘိန်း
မြို့ပြအနေအထား	ပိုသေးငယ်ပြီး အေးချမ်းတယ်။ သဘာဝပတ်ဝန်းကျင်နှင့် နီးကပ်တယ်။	ပိုကြီးမားပြီး ခေတ်မီတယ်။ နိုင်ငံတကာ အသွင်အပြင် ပိုရှိတယ်။
အလုပ်အကိုင်/လစာ	အလုပ်အကိုင်အခွင့်အလမ်း နည်းပါးပြီး လစာနှုန်းထား နိမ့်တယ်။	လူဦးရေများလို့ စျေးကွက်ကြီးတယ်။ အလုပ်အကိုင် အခွင့်အလမ်းပိုများသလို လစာလဲပိုကောင်းတယ်။
ကုန်စျေးနှုန်း	အခြားနိုင်ငံများနှင့် အလှမ်းဝေးသည့်အပြင် လူဦးရေနည်းပြီး ကျဲတာကြောင့် ကုန်စျေးနှုန်း ပိုမိုမြင့်မားပါတယ်။	နယူးဇီလန်ထက် ကုန်စျေးနှုန်းပိုမိုသက်သာပါတယ်။
လူမှုဆက်ဆံရေး	လူများက ပိုမိုဖော်ရွေ၊ စိတ်ရှည်ပြီး အကူအညီပေးတတ်တယ်။	မြို့ကြီးများတွင် လူအများက ပိုပြီး စိမ်းကားပြီး အလုပ်ကိုသာ အာရုံစိုက်တတ်တယ်။
လုံခြုံရေး	နိုင်ငံရဲ့ လုံခြုံရေးအဆင့် (Global Peace Index) ပိုမြင့်ပါတယ်။ အထူးသဖြင့် တောင်ကျွန်းမှာ အရမ်းအေးချမ်းပါတယ်။	လုံခြုံသော်လည်း ကြီးမားသောမြို့ကြီးများတွင် သတိထားရန် လိုအပ်ပါတယ်။ နယူးဇီလန်ထက်စာရင် လူမျိုးခွဲခြားတာ ပိုရှိပါတယ်။
ရာသီဥတု	အေးမြပြီး စိုစွတ်တယ်။ ရာသီဥတု လေးမျိုးလုံးကို သိသိသာသာ ခံစားနိုင်ပါတယ်။	ပိုပူပြီး ခြောက်သွေ့တယ်။ မြောက်ပိုင်းမှာအပူပိုင်းဒေသ ရာသီဥတုရှိပါတယ်။

---

🏞️ သဘာဝအလှနှင့် ဘေးကင်းမှု

• 🇳🇿 နယူးဇီလန် (NZ): နိုင်ငံရဲ့ သဘာဝရှုခင်း အလှအပတွေက ထင်ရှားပါတယ်။ ကျမ အကြိုက်ဆုံးအချက်ကတော့ ဒီနိုင်ငံမှာ မြွေမရှိရုံတင်မက၊ ဝက်ဝံ၊ ကျား၊ ခြင်္သေ့လိုမျိုး အန္တရာယ်ပြုနိုင်တဲ့ သတ္တဝါတွေလဲ မရှိပါဘူး။ ဒါကြောင့် သဘာဝပတ်ဝန်းကျင်ကို စိတ်ချလက်ချ စူးစမ်းလေ့လာနိုင်ပြီး လုံခြုံရေးအတွက် ဂရုစိုက်ရုံနဲ့ တောင်တိုင်းလိုလို တက်လို့ရတယ်။ အင်းတွေ၊ အိုင်တွေမှာ ရေဆော့နိုင်တယ်။ သဘာဝပတ်ဝန်းကျင်ကို တစ်ကယ်ထိတွေ့ ခံစားနိုင်ပါတယ်။

• 🇦🇺 ဩစတြေးလျ (AU): ကမ်းခြေများနှင့် ကန္တာရရှုခင်းများက ထင်ရှားတယ်။ သို့သော် မြွေ၊ ပင့်ကူ စသည့် အဆိပ်ရှိ သတ္တဝါများ ပေါများသဖြင့် သဘာဝထဲသွားလာရာတွင် အထူးဂရုစိုက်ရန် လိုအပ်ပါတယ်။

---

🛂 နိုင်ငံသား/အမြဲတမ်းနေထိုင်ခွင့် အပြန်အလှန် အကျိုးခံစားခွင့်

• ဩစတြေးလျရဲ့ အမြဲတမ်းနေထိုင်ခွင့် (PR) သို့မဟုတ် နိုင်ငံသား တစ်ဦးဖြစ်ပါက၊ နယူးဇီလန်မှာ နေထိုင်ခွင့်ရရှိမှာဖြစ်ပါတယ်။

• နယူးဇီလန်နိုင်ငံသား တစ်ဦးဖြစ်ပါကလည်း ဩစတြေးလျမှာ နေထိုင်ခွင့်ကိုရရှိမှာဖြစ်ပါတယ်။

အထက်ပါအကြောင်းအရာတွေကြောင့် လူတော်တော်များများက "NZ မှာ နိုင်ငံသားအရင်ယူပြီးမှ AU ကို ပြောင်းတာ" လို့ ကျမယူဆပါတယ်။

🔹🔹🔹🔹🔹

ကျမရဲ့ရွေးချယ်မှုကိုပြောရရင်တော့ အစက နယူးဇီလန်ရော သြဇီမှာပါ အလုပ်လုပ်ဖို့ အခွင့်အရေးရှိပင်မယ့် သဘာဝပတ်ဝန်းကျင်ကို နှစ်သက်တာရယ်၊ နယူးဇီလန်ကလူတွေ ပိုမိုဖော်ရွေတယ်လို့ကြားသိရတာတွေကြောင့် နယူးဇီလန်ကိုပဲ ဦးစားပေးရွေးချယ်ခဲ့ပါတယ်။ 

နောက်ပိုင်းမှာလဲ သြဇီရဲ့မြို့ကြီးတွေကို သွားလည်ဘူးပေမယ့် ရေရှည်နေဖို့အတွက် နယူးဇီလန်ကိုပဲ ကျမပိုနှစ်သက်ပါတယ်။ နယူးဇီလန်တောင်ကျွန်းမှာနေတာကြာတော့ အော်ကလန်၊ ကွင်းစ‌တောင်း လိုမျိုး မြို့ကတောင် ကျမအတွက် နည်းနည်းမွန်းကြပ်တယ်လို့ ခံစားရပါတယ်။

လူတိုင်းရဲ့ ကိုယ်ရေးကိုယ်တာ အခြေအနေနဲ့ အကြိုက်ခြင်းမတူညီတဲ့အတွက်၊ ကိုယ်လိုချင်တဲ့ ပတ်ဝန်းကျင်ပေါ် မူတည်ပြီး အကောင်းဆုံးရွေးချယ်နိုင်ကြပါစေလို့ ဆုတောင်းပေးလိုက်ပါတယ်။ 

မှ သွန်းသစ်သူ🌼